Atez atekoa babestu du LABek, eta ohartarazi du erraustea ez dela egokia

Gipuzkoako Diputazioa hondakinak kudeatzeko bultzatzen ari den bidea babestu egin du LAB sindikatuak. Sistemaren xedea birziklatzea izan behar duela uste du, eta bat egin du hondakinak atez ate biltzeko sistemarekin. Errauste plantak sortuko lituzkeen kalteez ohartarazi du, gainera: azaldu du hondakinak ez direla desagertzen erraustuta, energia kontsumitzen dutela plantek, birziklatzeak eta konpostatzeak baino lanpostu gutxiago sortzen dituztela, eta ingurumenari kalte egiten diotela. LABek kontuak eskatu dizkie EAJri, PSEri eta PPri, «aldaketekiko erresistentzia gogorra» agertu dutelakoan. Ostiralean bozkatuko dute Juan Carlos Alduntzin Ingurumen diputatuaren kontrako zentsura mozioa. Bilduk eta diputazioak egoera aztertu zuten atzo, bilera batean.