Atzo herriko taberna batean eraso matxista bat gertatu zela salatu du Legorretako talde feministak. Biktimari babes osoa eskaini diote, eta elkarretaratzera deitu dute, 19:00etan, herriko plazan.
Nahiz eta Ertzaintzak ez duen eraso matxistatzat jo, udalak, EH Bilduren eta EAJren adostasunarekin, irmo salatu du erasoa, eta «babes osoa» eskaini dio erasotua izan den emakumeari. Horregatik, martxan jarri du indarkeria matxistaren aurkako protokoloa: «Agerian dago erasoaren izaera matxista: gizonezko batek indarkeriazko eraso larria egin dio emakume bati». Udalak ere herritar guztiei dei egin die, «ardura» har dezaten eta protestan parte har dezaten.
Eusko Jaurlaritzako Segurtasun Sailak jakinarazi du gizonezkoak emakumea aurpegian jo zuela hainbatetan, taberna baten kanpoaldean eztabaida bat izan eta gero.
