Euskal Autonomia Erkidegoko 2013rako aurrekontuak "oso gogorrak" izango direla iragarri du Rikardo Gatzagaetxebarria Eusko Jaurlaritzako Ogasun eta Finantza sailburuak. Onda Vascan eginiko elkarrizketa batean, Gatzagaetxebarriak azaldu du lan egingo duela alderdiek aurrekontuak babesteko; hala ere, aitortu du litekeena dela alderdiei "kostatzea" Jaurlaritzak aurkeztuko dituen aurrekontuak onartzea.
Martxoaren 12an onartuko du Jaurlaritzak aurrekontu proposamena, gero Eusko Legebiltzarrean eztabaida dezaten. Gatzagaetxebarriak esan du legebiltzarreko taldeen eta Jaurlaritzaren "ardura" dela "aurrekontuak lortzeko elkarlanean aritzea"; nahiz eta alderdiek proposamena ez babestu, aurrekontuak onartzea "ez galarazteko" eskatu die.
