Cristobal Montoro Espainiako Ogasun ministroak gaur goizean adierazi duenez, Espainiako Gobernuak lege bat onartu nahi du aurrekontuak betetzen ez dituzten politikariak eta erakunde publikoetako kudeatzaileak auzibidean jartzeko. Gobernu gardentasun legea izena jarriko diote.
"Aurrekontu publiko bat kudeatzen duenak ezin du gastatu aurrekontuak jasotzen duena baino gehiago, egiten badu kontabilitatea faltsutzen ari baita, gero ordainezinak bihurtzen diren fakturak gordez", esan du. Enpresa pribatuetako kudeaketa jarri du eredu Montorok.
Gaineratu du erakunde publikoen kudeaketan zurruntasuna bultzatu nahi dutela, eta inork aurrekontuetan aurreikusi baino gehiago gastatu nahi badu, diru-sarrerak ere igo beharko lituzkeela esan du, zerga igoera adibide moduan jarriz. "Eta ondoren erabaki dezatela herritarrek hauteskundeetan ondo jokatu duen edo ez".
