Jose Antonio Pastor Eusko Legebiltzarreko PSE-EEko bozeramaileak jakinarazi du autogobernuaren txostenaren inguruan PSE-EEk izango duen jarrera EAJren helburuen araberakoa izango dela. Haren ustez, CiUk azken hauteskundeetan jaso duen “zartakoak” EAJ ohartarazi beharko luke.
Iñigo Urkullu Eusko Jaurlaritzako lehendakariak autogobernuaren etorkizunaz eta 1979ko Estatutuaren erreformaz hitz egin nahi badu PSE-EE eztabaidatzeko “prest” egongo dela azaldu du Pastorrek: “Ondoren bakoitzak interpretazio propioa egingo du, autogobernua ulertzeko askotariko moduak baitaude”. Helburua “diskurtso independentista bat” proposatzea bada, ordea, ohartarazi du PSE-EEk ez duela parte hartuko.
Urkulluk “Juan Jose Ibarretxek egin zuen hutsa ez errepikatzea” espero du Pastorrek, haren iritziz independentziak “euskal gizartea bi mundu kontrajarritan” banatuko bailuke: “Iraganeko eskema zaharrak errepikatu nahi badituzte, bi mundu kontrajarritan banatuko dute euskal gizartea: independentzia nahi dutenen eta Espainiarekin eta Europarekin batera Euskadik etorkizuna eraikitzea nahi dutenen artean”.
