Auzia «puztea» leporatu dio Urkulluk ezker abertzaleari

Iñigo Urkullu EAJren EBBko presidente eta alderdi horretako lehendakarigaiak uste du ezker abertzaleak «puztu» egin nahi duela Josu Uribetxebarria presoaren auzia, «hauteskunde interesak» direla medio. Punto Radion egindako elkarrizketa batean, buruzagi jeltzaleak adierazi du PPk eta ezker abertzaleak «tentsio ikuskizun» bihurtu nahi dutela larri dagoen presoaren auzia. «Espetxe araudi argi bat dago, baina egoera hau mugaraino eraman nahi dute biek ala biek». Uribetxebarriaren gaixotasuna «larria bada» hura askatzearen alde azaldu da Urkullu, «hala diolako espetxe araudiak». Nolanahi ere, buruzagi jeltzaleak uste du ETAk «gatibu» mantentzen dituela euskal presoak.