Auziez haratago, “herri honen ihardukitze eta galdeen entzunaraztea” ere izan du xede manifestaldiak, hau da, “demokrazia, bakea, adierazpen askatasuna, justizia, jendetasuna”, Maritxu Lopepek adierazirik —manifestaldiaren antolatzaile Libre Baxenabarre taldearen izenean mintzatu da—.
Intza Oxandabaratzek heldu den asteazkenean, urtarrilaren 21ean, dei auzia dauka Parisen. Aurore Martin, berriz, urtarrilaren 29an hastekoa den EHAK eta ANVren Madrilgo auziko 35 auzipetuetakoa da. “Intza eta Aurore, Garaziko bi herritar, bakoitza bere egoerarekin Euskal Herriak bizi duen egoeraren adierazle dira. Bata Parisen eta bestea Madrilen epaituak izanen dira. Euskal herriak eta herritarrek bakea eraikitzeko urratsak ematen dituzten memento berean, horra bi estatuen erantzuna: auziak eta presondegiratzeak, presoak beti bezain urrun eta dispertsatuak”, beti Lopeperen hitzetan.
Biak Garaztarrak izanki, Donibane Garazin bertan pentsatu dute mobilizatzea. Azken aste hauetan kanpaina berezia eraman dutela tokian berean. Izan ere, hari beretik, Garazi, Oztibarre eta Baigorriko 230 hautetsi eta kontseilarik salatu dute baita egoera. UMP, berde, zentrista, edota abertzaleak barne. Hautetsiek izenpetu mozioa manifestaldiaren ideia beretik doa. Honela laburbildu duena Lopepek: “Laster hiru urte Intza libro dela, justizia frantzesaren manuz, eta orai berriz giltzapera? Nola ulertu hori ? Bat batean hain lanjerosa bilakatua ote da berriz preso sartu izaiteko, bere seme eta lagunareganik urrundua izaiteko ? Ez ote da probokazio berri bat ? Ezin konprenitua dugu. Gure inguruan ainitzek ezin konprenitua dute. Horren adierazle da hautetsien sustengu zabala”, galdetu du Lopepek.
Hitzartzeak bururatzean, ondoko hitzordua astezkenearako finkatu dute, Oxandabaratzen dei auziaren egun berean, 19:00etan, Donibane Garaziko Herriko Etxe aitzinean.
