Eusko Jaurlaritzako Herrizaingo Sailak Europa Press albiste agentziari baieztatu dionez, ostiralean Hondarribiko Alardean ustez eskopeta baten kartutxo zati bat jota hil zen emakumeari tiro egin ziona auzipetu egin dute, heriotza ondorio duen lesio delitu bategatik.
Mari Carmen Gonzalez Hondarribiko alardean hildako emakumeari egindako autopsiaren arabera, eskopeta tiro baten kartutxoaren zati batek jota zendu zen, gaur El Diario Vasco egunkariak argitaratu duenez. Ertzaintzak BERRIAri ez dio albistea berretsi nahi izan.
Ostegunean izan zen ezbeharra, 65 urteko emakumea desfilea etxe bateko balkoi batetik ikusten ari zela, eta larunbatean hil zen, erietxean. Familiak "errespetua" eskatu du, eta Hondarribiko Udalak esan du ez duela horregatik adieazpenik egingo.
Kazeta hark dioenez, Ertzaintzak Gonzalez zegoen etxeko balkoian kartutxoaren zatiak emakumearen buruaren arrasto biologikoekin aurkitu ditu. Orain gertatutakoa irudikatzen saiatuko omen da Ertzaintza, argitu ahal izateko.
Gaur 19:00etan egingo da Gonzalezen aldeko hileta elizkizuna, Hondarribian.
