1994an Espainiako armadako teniente Miguel Peralta hiltzea egotzita zigortu zuen Espainiako Auzitegi Nazionalak Idoia Martinez euskal presoa. Urte hasieran epaitu zuten Angel Luis Hurtadok, Julio de Diego Lopez eta Jose Ricardo de Parada magistratuek. Azken horrek boto partikularra eman zuen, eta ez zuen bat egin Martinezi 28 urteko kartzela zigorra ezarri zion ebazpenarekin.
Auzi honetatik absolbitu duten arren, Martinezek kartzelan segituko du beste auzi batzuen espetxe zigorra betetzen.
Oraindik Gorenaren ebazpena idazteko dagoen arren, Auzitegi Nazionalaren epaiari kasazio helegitea aurkeztu zion euskal presoaren abokatu Alfonso Zenonen arabera, baliteke poliziaren aurrean eginiko deklarazioak baliagarritzat jo ez dituztela-eta erabaki izana absoluzioa. Izan ere, Mikel Azurmendik eginiko adierazpenetan oinarritu zen Auzitegi Nazionala. Azurmendik torturapean eginiko deklarazioa izan zela salatu zuen.
