Auzitegi Nazionaleko medikuak salatu dituzte, “tortura babesteagatik”

Munduko Mediku Elkarteari igorritako salaketan, sei kasuren berri ematen dute Argentinako medikuek: Ainara Bakedano, Anabel Prieto, Beatriz Etxebarria, Sandra Barrenetxea, Gorka Lupiañez eta Unai Romanorenak, hain zuzen. “Askoz gehiago ziren”, azaldu du Susana Etchegoyen Argentinako medikuak: “Baina horiek aukeratu ditugu, oso ongi dokumentatuta daudelako”. Auzi horietan guztietan, tortura salaketez gain, auzitegi medikuen txostena ere badago. Zenbait kasutan, auzitegi medikuek atxilotuen lesioak ere jaso eta deskribatzen dituzte, baina behin ere ez zituzten torturak salatu.

Munduko Mediku Elkartearen irizpideak arlo horretan oso argiak dira: auzitegi medikuak “eragile pribilegiatutzat” jotzen ditu, atxilotuekin harreman zuzena izateko aukera dutelako, eta mediku horiek tortura zantzuen berri izan eta hori salatzen ez dutenean, “torturaren konplize” gisa hartzen ditu.

Medikuek azaldu dute euren salaketa ez dela mediku zehatzen kontrakoa, jasotako kasuetan parte hartu zuten auzitegi medikuen izen-abizenak agertzen diren arren, eta ez dutela zigor eskaerarik egin: “Munduko Mediku Elkarteari eskatzen diogu esku har dezan, ikerketa bat abian jar dezan. Elkarteari dagokio horren inguruan zein neurri hartzen duen erabakitzea”. Gogoratu dute duela hamar bat egun Munduko Mediku Elkarteak berak salatu dituela, hain zuzen, Iraken tortura kasuetan parte hartu duten medikuak. “Pentsatzen dugu elkarteak ez dituela bi irizpide desberdin erabiliko, eta Espainiaren kasuan ere berdin jokatuko duela”, azaldu du Etchegoyenek.

Munduko Mediku Elkarteari igorritako txostenean, Jaiki Hadi elkarteko kideen kontrako polizia operazioaren auzia ere gehitu dute Argentinako medikuek. “Horretan ere elkartearen irizpideak oso argiak dira”, esan dute, “eta pentsatzen dugu oso larria dela presoen arta medikoaren ardura duten profesionalei jazartzea, horien lana babestu beharrean”.