AVTk antolatuta, ETAren biktimentzako "egia, memoria, duintasuna eta justizia" eskatzeko ehunen bat lagunek ibilaldi bat egin dute Araban, Langraizko espetxetik Zaballakoraino. "Nazkatuta gaude etakide presoei ematen dizkieten onurekin. Nahi duten guztia lortzen dute", esan du Angeles Pedraza AVTko presidenteak. Espainiako banderak erakutsi dituzte ibilaldian.
Madrilen, berriz, Voces contra el Terrorismok mila lagun elkartu ditu Espainiako Gobernuko Barne Ministerioaren egoitzaren atarian egindako elkarretaratze batean. Josu Uribetxebarria euskal presoa askatzearen aurka azaldu dira. Uribetxebarria duela hilabete pasatik Donostia erietxean dago, minbiziak jota.
