Gaur iragan da Parisen Jakes Esnal euskal presoaren baldintzapeko askatasun eskaera aztertzeko egin duten audientzia. Esnalek plazaratzen duen bigarren eskaera da, eta gaurkoan ere, ez askatzearen alde egin du prokuradoreak. Haren arabera, ez du nahikoa elementu Jakes Esnalen arrisku maila neurtzeko eta horregatik, desegokitzat jo du baldintzapeko askatasuna onartzea. Maritxu Paulus Basurco abokatuaren arabera, elementuak egon badaude Esnalen dosierrean, eta hauek erakusten dute ez dagoela arriskurik.
1990eko apirilean atxilotu zuten Jakes Esnal, ETAko kide izatea leporatuta eta bizi osorako presondegi zigorrera kondenatu zuten. Bere egoera berean dira Jon Kepa Parot eta Xistor Haranburu; biek ala biek egin dituzte baldintzapeko askatasun eskaerak, baina bakarrari ere ez diote onartu presondegitik ateratzeko baimena. Gaur arratsaldean elkarretaratzea egitekoa dute Donibane Lohitzunen, 19:00etan tren geltoki aitzinean, Esnal, Parot eta Haranbururen askatasuna eskatzeko.
