"Azkarra eta bortitza". Javier Morras Nafarroako Gobernuko Barne kontseilariak bi hitz horiekin deskribatu du azken orduetan Baztanen izan den ekaitza. Metro koadroko 107 litro ur bildu dute Gorraizeko meteorologia estazioan, eta, Morrasek azaldu duenez, gaur 05:50etik 06:50era 37 litro ur erori dira metro koadroko.
Ekaitza Baztanen lokalizatu dela adierazi du Morrasek, baina Doneztebe aldera ari dela pasatzen. Bortzierietako eta Malerrekako suhiltzaileak erne daude edozer gertaeraren aurrean erantzun ahal izateko. Baztanen hango suhiltzaileez gain beste eskualde batzuetako beste hogei ari dira lanean. Foruzaingoak bederatzi patruilla mobilizatu ditu.
Ekaitza, baretzera
Horrelako ekaitzak aurreikusten oso zailak direla esan du Morrasek. Datozen orduetan, ordea, ekaitza baretzea espero da. Hala ere, eguerdian uraren mailak gora egin dezakeela ohartarazi dute. 112 larrialdi zerbitzuetako telefono zenbakia tentuz erabiltzeko eskatu dute, eta, ahal izanez gero, etxetik ez mugitzeko; are eta gutxiago, autoarekin.
Gainera, Donezteben industrialde bat hustu dutela jakinarazi du Morrasek, baina esan du ez dagoela oraindik ziurtatuta uholdeengatik izan dela, eta agian tuberiaren bat puskatu delako hustu behar izan dutela.
