Eusko Jaurlaritzako Bake eta Bizikidetza idazkaritza nagusiak legealdi honetan garatuko dituen lan ildoen berri eman du Jonan Fernandezek Eusko Legebiltzarreko batzordean, Monica Hernando eta Txema Urkijorekin batera. Fernandezek azaldu duenez, bere departamenduaren lehentasuna “bizikidetzan inbertitzea” izango da, eta, horretarako, iraganari, orainari eta etorkizunari begira lan egingo du. Iraganari dagokionez, indarkeria eta giza eskubideen urraketa bakoitza argitu behar direla esan du Fernandezek, baina biktimen artean bazterketa eta parekotasunik egin gabe.
Ildo horretan, adierazi du Euskal Herrian azken 50 urteotan gertatu diren giza eskubideen urraketa guztiak barne hartzen dituen erreferentziazko datu baserik ez dagoela, eta beharrezkotzat jo du tresna hori izatea. Hala, txosten hori pertsona independenteek egingo dutela azaldu du, giza eskubideen urraketen eta sufrimenduaren mapa bat mugatu eta dimentsionatze aldera. Uda baino lehen prest egongo da.
Memoriaren Institutua
Bestetik, datozen hiru hilabeteetan Memoriaren Institutuaren proiekturako proposamena aurkeztuko du idazkaritzak, eta asmoa da egitasmo hori sortzeko prozesua aurtengo azken hiruhilekoan hastea eta hurrengo urtean jarraitzea.
Errekonozimendua eta ordaina giza eskubideen urraketen biktima guztiei hedatzeko konpromisoa hartu du, halaber, Fernandezek. Hala, motibazio politikoko biktimei dagokien bigarren dekretua lantzen jarraituko dutela jakinarazi du.
Fernandezek azaldu du Bake eta Bizikidetza idazkariak Espainiako Gobernuarekin “elkarrizketa eta lan zuhurra” egingo duela, hainbat helburu lortzeko asmoz: besteak beste, PPren gobernuari espetxe eskumenaren transferentzia eta presoen hurbilketa eskatuko dio, eta espetxe politika egoera berrira egokitzea. Halaber, epe laburrean bi neurri hartzea proposatuko dio Madrili: batetik, gaixorik dauden presoentzat irtenbide “humanitarioak” bilatzea, eta, bestetik, jarduera politikoekin zerikusia duten zigorrak dituzten presoentzat “zentzuzko neurriak” bilatzea.
