Biarno eta Euskal Herriaren arteko kantonamendurik ez da agertzen kantonamenduen mapa berrian. Nafarroa Behereko Amikuze eta Iholdi-Oztibarre, Biarnoko Nabarrengose eta Salbaterra Biarnori loturik kausitzen baldin baziren lehen proposamenean, azkenean ez lirateke horrelakorik gertatu behar. La République des Pyrénnées kazetak eskuratu du mapa berria.
Azkenean, Ipar Euskal Herriaren muga historikoak errespetatuko dira, eta anitzen poza eragin du berri horrek. "Kantonamenduen berrosaketa proposamenak erakusten du herri mobilizazioaz gauzak alda daitezkeela. Segi dezagun bide beretik", adierazi du, adibidez, EH Bai koalizioko Peio Etxeberri-Aintzartek Twitterren. Barthelemy Agerre Amikuzeko kontselaria ere pozik agertu da.
Kantonamenduen mapa berria urtarrilaren 9an aurkeztuko die kontseilari nagusiei Pierre-Andre Durand prefetak.
