Azpeitiko alkateari ezohiko udalbatzarrera deitzeko eskatu diote, preso baten egoera aztertzeko

Xabier Etxeberria Txapi (Azpeitia, Gipuzkoa) presoa gose greba egiten ari da Mureteko (Frantzia) espetxean martxoaren 3tik, Espainiaratzeko arriskua duelako, eta Amnistiaren Aldeko Mugimenduak (AAM) Julian Eizmendi (EAJ) Azpeitiko alkateari presoaren egoera aztertzeko ezohiko udalbatzarrera deitzeko eskatu dio. "Alkateak ez du ezer egin", salatu du Aritz Arzallus AAMko kideak gaur, Donostian egindako prentsaurrekoan. Etxeberriak dagoeneko hamar kilo galdu ditu.

Presoak hilaren 31n beteko du Frantziako Estatuan ezarri zioten espetxe zigorra. "Xabier kanporatua izango balitz Espainiako segurtasun indarren esku gelditzeko arriskuan egongo litzateke, tortura arriskuarekin", dio AAMk.

Lehengo ostegunean Azpeititik hainbat lagun Muretera joan ziren autobusean, Etxeberriari elkartasuna adieraztera eta egoera salatzera.

Duela sei urte atxilotu zuen Frantziako Poliziak, Bourges herrian, ETArekin lotura zuelakoan. Jabi Agirre azpeitiarrarekin batera atzeman zuten, eta hori iazko urte bukaeran Espainiaratu egin zuten, Frantziako zigorra bukatu ostean; Soto del Real espetxean daukate harrezkero. 2004ko ekainean zortzina urteko kartzela zigorra jarri zieten.