Azpeitiko Udalak «zuhurtzia eta errespetua» izateko eskatu die herritarrei

Azpeitiko Udalak babesa eta elkartasuna adierazi nahi izan dizkie Amaia Azkueren familiari eta baita Zarauzko herritarrei ere. Azpeitiko herria gertatutakoa «ulertu ezinda eta hunkiturik» dagoela adierazi du, eta udalak ere sentipen horrekin bat egiten duela. Herritarrei «zuhurtzia eta errespetua» izateko eskatu die: «Hedabideetako zurrumurru eta bestelakoek ez dute mesederik egiten; horren ordez, kalte ugari eragin dezakete».

Iragan martxoko gertakariak «oso larritzat» jo dituzte, eta gertatutakoa ahalik eta azkarren argitu dadila espero dute. Halaber, Eneko Etxeberria alkateak berak Azkueren senideekin zuzenean hitz egin duela jakinarazi du udalak, elkartasuna adierazteko. Zarauzko Udalarekin ere harremanetan jarri direla nabarmendu dute, eta kasuaren inguruan elkarlanean arituko direla.