Baiona-Donostia Euskal Eurohiriaren Garapenerako Mugaz Gaindiko Agentziako kideek dei egin diete administrazioei "oinak balaztatik altxatzeko", eta Baiona-Donostia eurohirian mugikortasuna erraztuko duten trenbide loturak indartzeko.
Martin Garitano Gipuzkoako ahaldun nagusia eta Jean Grenet Baiona-Angelu-Miarritze Hiri Elkargoko presidentea bildu dira gaur, Donostian, Aieteko jauregian, beste hainbat ordezkarirekin batera.
Garitanok nabarmendu du bien artean ez dagoela mugarik, "zubi bat baizik". "Euskara da batzen gaituena", gaineratu du.
Bi hiriak eta inguruko herriak lotzeko "tren bakarra" aldarrikatu dute, eta "funtsezko helburutzat" jo dute hori lortzea.
Bestalde, Grenetek salatu du Akitaniako erakundeek ez dutela "presarik izan" proiektua garatzeko. "Gai honen inguruan esateko zerbait dutenak mahai baten inguruan" bildu beharko liratekeela uste du. Grenetek aurreratu duenez, lanean hasiak dira, "interesatuekin eta proiektuaren eragina jasango dutenekin" eztabaidatzeko.
Eurohiriaren garapenerako agentziaren beste erronka bat Kantauriko itsas eremua babestea da.
