BAIONA. Asteon egin du Jean Rene Etxegarai Baionako auzapez eta Euskal Hirigune Elkargoko lehendakariak hiriko bestetako balorazioa, eta giro «goxoan» joan zirela esan du. Baina izan dira gertaera larriak; hilaren 26an, gauean, 46 urteko gizonezko bati eraso egin zioten etxera sartzen ari zela. Ate aitzinera iristean, hiru gizonek sartzea trabatu zioten; galdetu zienean handik mugitzeko, jo egin zuten, behin eta berriz, bortizki. Baionako prokuradoreordeak esana zuen gizona koma artifizialean zegoela, eta hiltzeko arriskua zuela oraindik. Atzo ilunabarrean France Bleu hedabideak jakinarazi zuenez, hil da gizonezkoa.
Erasoaren berri izan ondoren, ikerketa bat abiatu zuten, hilketa ahaleginarengatik, eta Polizia erasotzaileen bila dabil. Beste heriotza bat ere izan zen Baionako besten testuinguruan. 18 urteko mutil bat hilik atzeman zuten igandean bere etxean, Donibane Lohizunen (Lapurdi). Iturri ofizialek adierazi zutenez, «ez zuen osasun arazorik, eta kirolaria zen». Zehaztu zuten mutilaren bi adiskidek onartu zutela alkohola edateaz gain «estasi gisa saldu zizkieten bi pilula» erosi zituztela.
Indarkeria matxistaren itzala ere presente egon da Baionako bestetan; lau bortxaketa salatu dira. Horietako bat artxibatu gin du Fiskaltzak. Herriko Etxearen arabera, 1,3 milioi bestazale izan dira guztira bestetan, eta balorazioan, oro har, izan den giro ona nabarmendu behar da.
Protesta herriko etxearen aitzinean
Ostiral arratsalde honetan elkarretaratze bat eginen dute, Baionako herriko etxearen aitzinean, indarkeriak gaitzesteko. Hiriko peñek, ostatu zenbaiten jabeek, elkarte batzuek eta PAF talde feministak egin dute deialdia. Hildako gizona oroituko dute, baina bestetan izan diren lau bortxaketak ere gaitzetsiko dituzte.
