Ipar Euskal Herrian maiatzaren 11tik goiti hasiko dira konfinamendutik ateratzen, eta Frantziako Gobernuak herritar guztiek maskara izatea jarri du helburutzat. Emmanuel Macron Frantziako presidentea honela mintzatu zen: «Estatuak modua eman beharko du publiko zabalak maskara eskuratu dezan. Haren erabilera sistematiko bilaka daiteke». Hala, Jean Rene Etxegaraik iragarri du Baionako herritar guztiei maskarak helaraziko dizkiola herriko etxeak, maiatzaren 11 baino lehen.
Le Beret Français tokiko enpresak ekoitziko ditu telazko maskara berrerabilgarriak, eta herriko etxeko langileek banatuko dituzte, «herritarrek etxetik mugitu beharrik ez izateko». Guztira, 185.000 euro balio dute maskarek, baina urririk banatuko dizkiete herritarrei.
Euskal Hirigune Elkargoak espero du 600.000 maskara banatzea «datozen asteetan»; hau da, Ipar Euskal Herriko biztanle bakoitzeko bi maskara.
