Donostiako PSEk, EAJk eta PPk adierazpenak egin dituzte Bake Konferentziaren inguruan. Datorren ostiralean Giza Eskubideen udaleko komisioa bilduko da, eta bertan konferentziaren inguruan hitz egingo du Juan Karlos Izagirre Donostiako alkatea.
Ernesto Gasco PSEko ordezkariak hala adierazi du: “Gisa horretako konferentzia bat ospatu nahi izanez gero, egin beharreko lehenengo gauza etxekoekin batzartu, eta modu bateratuan horrekiko batasun jarrera bat aurkeztea da”.
Izagirrek “aldebakartasunez” jardun duela salatu du Gascok, eta haren aburuz, horrek bi gauza adierazi ditzake: “Gauzak ez dira ondo egiten, edo manipulatzeko nahia dagoela susma daiteke”. Horren harira, “ETAren terrorismoaren biktimen aitortza” nabarmendu behar dela gaineratu du.
PPko zinegotzi Maria Jose Usandizagak ere, ETAren biktimak aipatu ditu, eta Izagirrek Bake Konferentzia antolatu izana gaitzetsi du. Haren iritziz, Izagirrek “gauza asko dauzka egiteke” konferentzia hori egin aurretik: “ETA kondenatu eta egin duen mina aitortzea”.
Eneko Goia EAJko ordezkariaren arabera, ekimen hori “positiboa izan daiteke”, baina, soilik “irudi kontuetatik harago baldin badoa”. EH Bildu “promozio eta publizitatean espezialista” dela uste du Goiak. Jakinarazi duenez, Izagirrek ez du konferentziaren inguruko “zehaztasun handirik” eman, eta zein “ikuspuntu” duen aztertu behar dute. Dena den, “aurrera egiteko balio badu” EAJk babestu egingo duela esan du.
