Martxo amaieran egin zuen urteroko bilkura Mexikoko PT Lanaren Alderdiak, eta nazioarteko 139 alderdi eta mugimenduk parte hartu zuten, horien artean, Kubako eta Txinako Alderdi Komunistak, PSUV Venezuelako Alderdi Sozialista Batua, Alemaniako Die Linke eta Saharako Fronte Polisarioa. Besteak beste, han izan zen Sortuko kide Asier Altuna ere.
"Gatazka politikoa konpontzeko aukera historikoa" aipatuz, Euskal Preso Politikoen Kolektiboak eta Euskal Iheslari Politikoen Kolektiboak egindako "ekarpen baliotsuak" nabarmendu dituzte. Egoera horiek konpontzeko, Espainiari eskatu diote gaitz larriak dituzten presoak eta legearen arabera kalean egon behar luketenak askatzeko eta sakabanaketa politika amaitzeko.
Gainera, "iritziagatik edo jarduera politikoagatik" preso dituztenak kaleratzeko ere eskatu dute, aipamen berezia eginez Arnaldo Otegi Sortuko idazkari nagusiari. Azkenik, torturapeko deklarazioak oinarri dituzten prozedurak, preskribatuta egon behar luketenak edo iritzi, adierazpen eta biltze eskubideak urratzen dituztenak bertan behera uztea galdegin dute.
Babesa Aieteko Adierazpenari
2011ko urriko Aieteko Adierazpena ere ekarri dute gogora adierazpenean alderdi eta mugimendu horiek: "Babes handia jaso du nazioartean". Besteak beste, oroitarazi dute iazko urrian Mexikon bertan egindako Euskal Herriarentzako Pakearen Aldeko Kontinenteko Topaketa eta bide orri hari Latinoamerikako hamalau presidente ohik emandako babesa.
