Baldintzarik gabeko espetxearen eta baldintzapeko askatasunaren artean "disfuntzioa" zegoela argudiatu zuen fiskalak, eta bigarrena kentzeko eskatu zuen. Onartu egin du eskaera orain Auzitegi Nazionalak, eta kendu egin dio Josu Uribetxebarriari 2012ko abuztuan onartutakoa. Hala, baldintzarik gabeko espetxeratzean geratuko da euskal presoa, 1997an atxilotu batek inkomunikazio aldian egindako deklarazioetan oinarrituta ireki zioten auzi berriagatik.
Ismael Moreno epaileak ireki zion auzi hori, eta Bergarako epaitegian deklaratu ondoren, etxean preso sartzea erabaki zuen, besteak beste, "ihes egiteko arriskua" zuela esanez. Defentsak salatu zuen "helburu politiko eta mediatikoei" soilik erantzuten diela erabakiak, juridikoki ez lukeelako aldatuko, auzi berrian epaitu eta zigortuko balute ere, Uribetxebarriak bete beharreko kartzela urteen batura —30 urteko gehieneko zigorra du—.
Gaitz larri eta sendaezina du, eta horregatik ez zuen espetxera bidali Moreno epaileak, mediku txosten guztiek hala aholkatzen dutelako. Oraingoz, beraz, etxean preso jarraituko du, Poliziaren zaintzapean.
