Astelehenean bete dira bi urte Hodei Egiluz Galdakaoko (Bizkaia) gaztea desagertu zela Anberesen (Flandria). Urteurrena gogoan, jardunaldiak egin dituzte Europako Legebiltzarrean desgerturik dauden europarrei buruz. Batik bat, haien bilaketa lanak hobetzeko protokoloak eta baliabideak nola findu izan dituzte hizpide legebiltzarreko hainbat ordezkari politikok.
Besteak beste, Izaskun Bilbao EAJko legebiltzarkideak parte hartu du jardunaldietan. Haren esanetan, zerbaitek “huts” egiten du; desagertuen datuak ez direla behar bezala gurutzatzen salatu du. Jardunaldiarekin batera elkarretaratzea ere egin dute Bruselan Egiluzen senide eta lagunek. Larunbatean, Anberesen egin zuten kontzentrazioa.
Egiluzen aita Pablo Egiluzek Radio Euskadin adierazi du Belgikako Gobernuari eskatuko diotela baliabide gehiago jar ditzala bilaketa lanetarako. Anberesko fiskalak Hodei Egiluzen desagertzeari buruzko ikerketa ixtea erabaki eta gero egingo dute eskaera hori.
Espainiako Kongresuan ere izan dute hizpide Egiluzen auzia. Amaiur alderdiak galdera sorta bat egin dio Espainiako Gobernuari gaztearen desagertzeari buruz zer ekimen burutu dituen jakiteko.
Gaur 2 urte bete dira Hodei E. desagertu zenetik. Gob-ri eskatu diogu + inplikatzeko Belgikako gob batera ikerketan pic.twitter.com/l9x2inmUMR
— Jon Inarritu (@JonInarritu) October 19, 2015Bi urte berririk gabe
Hodei Egiluzek ingeniari informatiko ziharduen Anberesko enpresa batean, eta lankideekin afaltzera atera zen; etxerako bidean lapurreta egin zioten, eta, ondoren, haren arrastoa galdu zen.
Erasoaren ostean, gaztearen irudiak jaso zituzten MAS museoaren inguruko segurtasun kamerek, eta lekukoek adierazi zuten Egiluzek laguntza eskatu ziela, norbait segika zuela-eta, baina lasai uztea erabaki zutela, nahastuta zirudielako. Ondoren gertatutakoaz ez dago arrastorik. 23 urterekin desagertu zen.
