Baltasar Garzonek 14 atxilotuetatik 11 espetxeratzeko agindua eman du

Baltasar Garzon Espainiako Auzitegi Nazionaleko epaileak asteleheneko sarekadan atxilotutako ezker abertzaleko 14 kideetatik 11 baldintzarik gabe kartzelatzeko agindua eman du gaur arratsean: Mikel Etxaburu, Karmelo Landa, Eusebio Lasa, Aitor Aranzabal, Karmele Aierbe, Peio Xabier Galvez, Joseba Zinkunegi, Mikel Garaiondo, Nuria Alzugarai, Iñigo Balda eta Jose Manuel Jurado. Batasuneko Mahai Nazionala berregiteko ahaleginean aritzea eta, ondorioz, ETAko kide edo laguntzaile izatea egotzi die.

EHAK-ko diruzain Jesus Mari Agirre eta Sonia Jacintori 50.000 euroko bermea jarri die, eta Josetxo Ibazetari 60.000koa. Lehen biei ETAri laguntzea egotzi die eta hirugarrenari "erakunde terroristako kidea" izatea.

Dolores Delgado fiskalak aurrez, hamalau haietatik Agirre eta Jacinto ez beste denak kartzelatzeko eskatu du. Agirrerentzat 30.000 euroko bermea eskatu du eta Jacintorentzat 20.000koa.

Kepa Bereziartua EAE-ANVko presidenteari ere hartu dio deklarazioa Garzonek, Fiskaltzaren eskariz -ez zuten atzeman hura-, eta 20.000 euroko bermea jarri dio, fiskalak eskatu bezala. "ETAri dirua ematea" leporatu dio. ANVko presidentea 40 bat minutuz egon da Garzonen gelan, eta ez ditu fiskalaren, Dignidad y Justicia eta AVTren galderak erantzun. Iñigo Iruin izan du abokatu, eta honen itaunak baino ez ditu erantzun. Akusazio denak ukatu ditu. Guardia Zibilak haren jabetzako lojak miatu ditu bart Barakaldon (Bizkaia).

Espainiako Poliziak astelehenean atxilotutako ezker abertzaleko hamalau kide haiek gaur goizeko hamarretan eraman dituzte Auzitegi Nazionalera, Garzon epailearengana eramateko gero, honek deklarazioa har diezaien. Bereziartuta hartu ondoren hasi da besteei deitzen. Karmelo Landa hartu du lehendabizi, Txema Jurado ondoren. Biek ere ez dute deklaratu nahi izan, ezta besteek ere.

Haien atxiloketak Garzonek berak agindu zituen, eta bera Donostian izan zen astelehen goizaldean operazioa gidatzen.