Nafarroako Parlamentuak etxebizitza eskubidea bermatzeko legea onartu zuen ekainean, UPNren eta PPren kontrako botoekin. Lege horrek aukera ematen zuen kaleratze prozesuan dauden etxeak bankuei bahitzeko eta familiak etxean hiru urtez mantentzeko, alokairu baten truke. Alokairuak familiaren sarreren %25 baino gutxiago behar luke. Urriaren 11n, Espainiako Gobernuak helegitea jarri zion legeari Auzitegi Konstituzionalean. Eta auzitegi horrek bertan behera utzi du gaur Nafarroako Parlamentuak onartutako legea, helegitea tramitera onartu eta gero.
Nafarroako Parlamentuak, bestetik, hamabost eguneko epea du orain helegiteak aurkezteko. Eta Auzitegi Konstituzionalak bost hilabeteko epea izango du erabakia berresteko edo atzera egiteko. Datozen asteetan aztertuko dute auzia sakonean.
Espainiako Gobernuak, jarritako helegitean, adierazi zuen etxebizitza eskubidearen legeak «estatuaren eskumenak urratzen» zituela, eta horretarako Espainiako Konstituzioaren 161.2 artikuluari egin zion erreferentzia. PPren gobernuaren arabera, Nafarroako Parlamentuak onartutako legeak «arbitrarioki» diskriminatzen ditu herritarrak, etxeen erabilera bankuei bahitzerakoan.
Nafarroan gertatu bezala, Andaluzian ere hala gertatu zen uztailean. Bankuei etxeak bahitu eta familiei alokatzeko aukera ematen zuen legea onartu zuen Andaluziako parlamentuak, baina Espainiako Gobernuaren helegitearen eraginez, Auzitegi Konstituzionalak bertan behera utzi zuen.
