Yolanda Barcina Nafarroako Gobernuko lehendakariak iragarri du PSNk eta oro har PSOEk azaroaren 20an Espainiako hauteskundeetan emaitza txarrak lortzen badituzte, horrek foru gobernuko UPN-PSN akordioa baldintza dezakeela.
UPNk eta PSNk duela bi hilabete sinatu zuten hitzarmena, "Nafarroaren gobernagarritasunagatik eta Bilduren orbana gehiago ez zabaltzeko", Barcinaren arabera.
Orain, ordea, UPNk PPrekin egin du Espainiako hauteskundeetarako ituna, eta Barcina oso baikor dago, hiru diputatu eskura ditzaketelakoan —Nafarroan jokoan bost aulki egongo dira—. "Emaitzarik onena UPNk hiru, PSNk bi litzateke", esan du gaur Madrilen, Europa Pressen ekitaldi batean. "Baina hori amets bat da, ilusio bat".
UPNk eta PPk aitortu dute ezker abertzaleak, Aralarrek, EAk eta Alternatibak osatutako koalizioa Nafarroan lehen indarra ez izateko bildu direla.
