Bartzelonan Iñigo Cabacasen senide eta lagunei babesa agertzeko eta gomazko piloten erabileraren aurka azaltzeko elkarretaratzea iragarri dute iganderako. Katalunia plazan egingo dute bilkura, 17:00etan. Horrela, Bilbon 16:30ean hasiko den manifestazioarekin bat egingo dute. Stop Bales de Goma Kataluniako elkarteak gomazko piloten erabilera debekatzeko eskatu du.
Francesca Oggiano kazetari eta argazkilariak The stolen eyes (Galdutako begiak) erakusketa prestatu du, pilotakadak jaso dituzten lagunen argazkiekin. Erakusketa ikusgai izan da Bartzelonan otsailean, CCCB Kultura Garaikidearen Zentroan, eta Londresen izango da apirilaren 27tik maiatzaren 20ra. Sarean bideo bat zabaldu du artistak piloten erabilera salatzeko.
