2009ko bozetatik hiru legebiltzarkide eta 15.000 boto galdu ditu PPk, eta Antonio Basagoiti lehendakarigaiak aitortu du bera dela jaitsieraren "erantzulea". Baina EAEko PPren presidente karguan jarraituko duela ere esan du Cope irrati katean egin dioten elkarrizketa batean. "Indarrarekin nagoen artean eta alderdikideek karguan nahi nauten artean segituko dut".
Atzoko emaitzak PPrentzat "txarrak" direla onartu du Basagoitik, eta erabaki batzuk hartuko dituela aurreratu du. Ez du, baina, jakinarazi zer neurri hartuko dituen.
Hezkuntza sistema "abertzaleari" bota dio EAJk eta EH Bilduk 75 legebiltzarkideetatik 48 lortu izanaren errua. "Euskal eskola publikotik ateratzen ari diren lehen belaunaldikoetakoak hasi dira bozkatzen". Haren arabera, "Espainiari gorroto" izaten irakasten da hezkuntzan.
PSEk-EE, UPDk eta PPk —"Espainian sinisten dutenek"— datorren legealdian bat egin beharko lukete, Basagoitiren ustez.
