Baztandarren biltzarra ospatu zen atzo Elizondon, Baztango herri guztiak bildu eta festa egiteko duela 48 urte sortu zen biltzarra.
Baztango herri bakoitzak bere historiari edo egoera bati buruzko orga eraikitzen du eta ospakizunean egiten den desfilean hartzen du parte berarekin. Aurtengo irabazlea Elizondoko Beti Zurrutak taldea izan da Santanderreko zurginak Baztanen izenburuko orgarekin. Bertan, Santanderretik Baztanera etorri ziren zurginen bizimodua azaldu zuten, basoko zuhaitzak zerratzen aritzen zirenekoa, alegia.
Aurtengo edizioan Baztango ikastola omendu dute, 40 urte bete dituela-eta. Ikastolako irakasle batek, guraso batek eta haur batek eraman zituzten desfilearen buruan ageri ohi diren banderak.
