Azken egunetan, hainbat heriotza mehatxu egin dizkiete Garbiñe Elizegi Baztango alkateari eta Mikel Sobrino Elizondoko alkateari, posta bidez. Atzo heldu zitzaien bigarren mehatxu gutuna.
Mehatxu horiei erantzuteko agerraldia egin du gaur Baztango Batzar Nagusiak. Bertan, mehatxuak "onartezinak" direla esan, eta "faxismorik gabeko herri bat" eraikitzera bultzatu ditu herritarrak. Era berean, ikurrina jartzeko deia egin die baztandarrei.
Nazionalista Nafarren Elkarteak bere gain hartu ditu heriotza mehatxuak. Agirietan azaldu duenez, Baztango Udalak ikurrina kentzea eta Espainiako bandera jartzea nahi du. Eskakizun horiei erantzun die gaur batzarrak. Espainiako bandera "arrotza eta iraingarria" dela esan du. Eta ikurrina, ordea, "baztandar gehienen ikur".
Bilduk atzo kaleratutako agirian, testuinguru politikoaren ondoriotzat jo zituen erasoak: "Espainia, UPN eta PP alderdia EH Bildu eta sektore subiranisten aurka elikatzen ari diren jazarpen politikoaren ondorio dira erasoak".
