EH Bilduk atzo aurkeztu zuen hauteskunde kanpainan egingo duen ekitaldi nagusia. BEC Bilbao Exhibition Centren egingo dute, Barakaldon, urriaren 13an. InBECendentzia deitu diote ekitaldiari. Laura Mintegi koalizioko hautagaiak dei egin zien "ezkerreko subiranista guztiei, Europan estatu libre bat" aldarrikatzeko. "Egun horretan, Madrilek eta Parisek entzungo dute zein den herri honen eskaria, eta adi egotea gomendatzen diegu", adierazi zuen Mintegik.
Euskal estatua ezkerretik eraikitzeko asmoa azaldu zuen Mintegik, "denon parte hartzearekin, eta denontzat". Horren harira, esan zuen koalizioak ez duela independentzia nahi "irteerarik eskaintzen ez duten politika neoliberal berdinak" ezartzeko.
Mintegik uste du krisi ekonomikoak agerian utzi duela lurralde, erakunde eta eredu ekonomikoaren porrota, eta, ildo horretan, subiranotasun ekonomikoa defendatu zuen, "justizia soziala" bermatzeko. "Euskal Herriaren garaia iritsi da", ziurtatu zuen, eta garai horrek "arriskuak" izango dituela baina "aukeraz beterik" egongo dela gaineratu zuen.
