Bekak lortzea zaildu izanaren aurka agertu dira errektoreak

Aurreko astean planto egin zioten, baina atzo bilera egin zuten Hego Euskal Herriko eta Espainiako unibertsitateetako errektoreek eta Espainiako Hezkuntza Ministerioak. Beken sistema berria hartu zuten hizpidetzat. Madrilgo gobernuak zaildu egingo du unibertsitateko ikasketak egiteko bekak lortzea: nota handiagoa eskatuko du diru laguntza kobratzeko. Horren aurka agertu dira errektoreak, familiek gastuari aurre egiteko zailtasunak dituztela eta. Murrizketei buruz hilaren 7an hitz egingo dute errektoreek eta Jose Ignacio Wert ministroak. Aurreko bileran horri buruz eztabaidatu nahi zuten unibertsitateetako arduradunek, baina ezetz esan zien Wertek, horregatik egin zioten planto. Hitz egitea onartu du orain.