Azaroaren erdialdean jakingo da Iñaki de Juana euskal preso ohia Irlanda iparraldetik Espainiaratuko duten edo ez, Belfasteko Auzitegiak gaur iragarri baitu hurrengo hileko 12an edo 13an emango duela epaia. Thomas Burgess epaileak darama kasua, aurtendik.
Dena dela, baliteke auzia gehiago luzatzea, Belfasteko Auzitegiaren epaiaren ondotik helegiteak baleude, hango Apelazio Auzitegira pasatuko litzatekeelako kasua, eta gero Erresuma Batuko Auzitegi Nagusira, Londresera.
Iazko abuztuan De Juana aske geratu zenean, Donostiako ekitaldi batean haren ustezko gutun batean "aurrera bolie!" jartzen zuelako "terrorismoa" goratzea egotzita auziperatu egin nahi du preso ohia Espainiako Auzitegi Nazionalak. Belfasteko epailearen arabera, badago nahiko lege arrazoi euroagindu eskaera onartu eta De Juana Espainiaren esku uzteko. Epaileak argudiatu zuen hark, egozten dizkioten adierazpenak Erresuma Batuan egin izan balitu, 2006ko Lege Antiterroristan jasota dagoen arau-haustea leporatu ahal izango luketela.
Iazko azaroaren 17tik zaintzapeko askatasunean bizi da De Juana Belfasten.
21 urtean eduki zuten preso Espainiako kartzelatan, ETAko kidetzat jota.
euskal presoak
Belfasteko Auzitegiak azaroaren erdialdera emango du De Juanaren epaia
Preso ohiaren ustezko gutun batean "aurrera bolie!" jartzen zuelako "terrorismoa" goratzea egotzita auziperatu egin nahi du Espainiako Auzitegi Nazionalak.
Iruzkinak
Ez dago iruzkinik
Ordenatu
