Belodromora joatera deitu dute Larreinak eta Matutek

Gaur izango da Amaiurren kanpainako ekitaldi nagusia. Hala, Rafa Larreina Amaiurreko Gipuzkoako zerrendetako bigarrenak Hondarribitik atzo Belodromora joateko deia egin zuen. «Herri borondatea adierazteko, ekitaldi garrantzitsua izango da». Larreinaren arabera, Amaiurrek Aieteko Adierazpena garatzeko asmoa du, eta xede horien artean dago «akordio politiko bat» lortzea, printzipio demokratiko gisa erabakitzeko eskubidea jasoz. Oskar Matutek ere uste du gaur Belodromoak «euskal ezkerraren erdigunea» izan behar duela. Matuteren ustez, azaroaren 20a «aukera historikoa» da herriaren ahotsa Madrilera eraman eta erreforma ekonomikoei aurre egin ahal izateko.