Espainiako Gorteetarako hauteskundeak / Erreakzioak
Bergarako Proposamenak 120.000 boto lortu dituela agertu du Otegik, eta elkarrizketarako deia egin die euskal alderdiei
Gustura agertu da Arnaldo Otegi Bergarako Ekimenak lortutako emaitzekin. Eurek egindako zenbaketaren arabera, 120.000 boto eskuratu dituztela azpimarratu du, "EAk, Aralar-Zutikek eta EB-IUk baino gehiago". Gainera, Bergarako Proposamenak kanpaina egiteko izan dituen zailtasunak oroitarazi ditu, eta, nabarmendu du, ondorioz, are eta esanguratsuagoak direla talde horren emaitzak. Boto kopuru hori aintzat har dezatela eskatu die osterantzeko euskal alderdiei, eta elkarrizketarako eskaintza egin die.
Otegik deialdi zehatza egin die "euskal alderdi politiko guztiei": elkarrizketa dinamika bat eraikitzekoa, eta haren ildotik, adostasun politiko bat iristekoa ordezkaritza nazional bat eratu eta haren bidez Espainiako Estatuarekin negoziazio politiko bat hasteko. Funtsean, Bergarako Proposamena jarri du berriro mahai gainean ezker abertzaleko buruzagiak.
Iruzkinak
Ez dago iruzkinik
Ordenatu
