Ibarrako jaietako txupinazoa, Areatzako txokolate jatea, eta orain Bermeoko jaietako beste bi ekitaldi. Espainiako Gobernuaren ordezkari Carlos Urkijok auzitegietara jo du beste behin, Bermeoko jaietan presoen alde egitekoak dituzten bi ekitaldi debekatzeko eskatuz. Haren esanetan, bi akitaldiok "urratu" egiten dute legeak administrazioari ezartzen dion "objektibotasun printzipioa".
Bide beretik, Iñigo Urkullu lehendakariari eskatu dio gogora diezaiela EH Bilduko alkateei "terrorismoaren biktimei ohore egitea" ez datorrela bat "borreroak goratzearekin". "Euskal instituzio guztiek biktimak babestu eta borreroak baztertzen ez dituzten bitartean, ez da demokraziarik izango".
Bere jarduna kritikatu dutenei ere erantzun die Urkijok, argudiatuz libre direla kritika egiteko edo Gobernuaren ekintzez barre egiteko, baina ez "legea urratzeko", eta "legean sinesten dutenek, hura defendatzeko eta betearazteko betebeharra" dutela.
Debekua
Espainiako Auzitegi Nazionalak Arazuriko jaietan egitekoa zuten pintxo-potea debekatu du, Montxo Varea euskal presoaren aldekoa dela argudiatuta. Ebazpenaren arabera, "litekeena da terrorismoa goratzea helburu duten ekintzak egitea". Igandean zen egitekoa ekitaldia.
