Bermeoko portuko olatu horma hautsi du denboraleak

Denboralea arazoak sortzen ari da hainbat lekutan, batik bat, kostaldean. Hondamen handiena Bermeon (Bizkaia) jasan dute oraingoz, portuan: olatu horma hautsi egin du denboraleak. Horrez gain, kaian amarratuta zegoen itsasontzi bat hondoratu egin da itsaso zakarraren eraginez.

Elantxoben (Bizkaia), berriz, arraun elkartearen egoitza suntsituta geratu da.

Itsasoko denboraleak kalte nabarmenak eragin ditu Gipuzkoan. Zarauzko malekoian eta Getaria bideko pasealekuan, esaterako, Urola Kostako Hitzak dioenez. Goizetik tabernariak ate eta leihoak estaltzen aritu dira, arratsaldean berriz ere itsasgora izan delako.

Getaria eta Zarautz arteko itsas pasealekuaren zatirik berrienean eskailerak eta ehun metro inguruko baranda zatia zeharo hondatu ditu itsasoaren indarrak.

Errepideetan ere arazoak sortu dituzte haizete eta euri bolada handiek, eta hainbat istripu izan dira han eta hemen. Hala, kamioi batek izan duen istripuaren ondorioz, N-121 errepidea itxi egin behar izan dute Irun (Gipuzkoa) parean Nafarroarako noranzkoan, eta hala egon da zazpi orduz, arratsaldeko hiruak arte.

BI-631 errepidean eta GI-631ean ere arazo handiak izan dira, batean zein bestean, luiziak gertatu direlako. BI-631ean Sollubetik Bermeorako jaitsieran gertatu da lurjauzia, eta harriak eta zuhaitz adarrek errepidea trabatu dira. GI-631ean Zumarragatik Aizpurutxora bidean gertatu da gauza bera. Nolanahi ere, batean zein bestean bide bat irekitzeko modua izan dute ertzainek.