Garbitze lanetan laguntzen ari dira inguruko hamabost taberna eta saltokitako jabeak; asmoa da astelehenean kalea berriro zabaltzea.
Agirrek azaldu duenez, hala ere, inguru guztia ezin izango dute oraindik garbitu, polizia zientifikoak bere ikerketa amaitu behar baitu lehenik; ikerketa hori sutea zerk eragin zuen argitzeko da.
Bien bitartean, kaltetuei laguntza psikologikoa ematen jarraitzen du talde batek. Agirrek beharrezkotzat jo du babes hori, egunak pasa ahala konturatzen direlako gertatutako "dramaz", eta "okerrago" daudelako. "Etxebizitzak, jantziak edo laguntza emateko ahaleginak egin arren, ez da nahikoa izaten; norbaitek zerbait galtzen duenean duintasuna galdu duela ere badirudi", esan du.
Etxerik gabe geratu diren 35 familietatik gaur zazpi udalarenak diren etxebizitzetara eraman dituzte, eta hurrengo astean aldundiarenak diren etxebizitzetara lekualdatuko dituzte. Beste hainbatek hoteletan igaro dute gaua, eta gainerakoek senide eta lagunen etxeetan. 16 familiak galdu dute etxea.
