Irune Soto EH Bilduko ordezkariarentzat, "begien bistakoa da Jose Luis Bilbaoren gobernuaren, politikaren eta Bilbaoren beraren akidura". Sotok uste du Bizkaiko Foru Aldundia ez dela "irtenbideak proposatzeko gai". Diputazioaren politikak "zaharkituta" geratu direla iritzi dio.
Sotoren arabera, Bilbaok "merkatuentzako ekonomia bat" egiten du, "pertsonentzako ekonomia bat" egin beharrean. Dioenez, diputazioak gizarte arloko ezberdintasunak "areagotu" egiten ditu, eta ez du "lidergorik".
Mikel Torres PSE-EEko kidearen ustetan, Bilbaoren kudeaketa ez da "ona" izan. Bizkaitarrak "batzen saiatu" baino gehiago, "banandu" egin dituela iritzi dio.
Esther Martinez PPk Batzar Nagusietan duen bozeramaileak esan duenez, Bilbaoren diskurtsoa "labainkorra eta nortasungabea" izan da. Kudeaketaz hitz egiterakoan "denboran saltoak" eman dituela dio, "kontua saihesten ahalegintzeko".
