BERRIA Taldeko langileek Barrura begiratzeko leihoak euskal presoei buruzko dokumentalari 300 euroko laguntza ematea erabaki dute, "filmaren egileek adierazpen eta sormen askatasunean jasan duten erasoagatik".
Euskarazko hedabide taldeko langileek gogoratu dute 2003an Euskaldunon Egunkaria-ren itxieraren ondorioz "herritarren laguntza moral eta ekonomiko eskergarria" jaso zutela eta, hori gogoan izanik, orain eurek aipatutako dokumentala laguntzea erabaki dutela.
Espainiako Gobernuaren kanpaina bat dela medio, filmaren Zinez ekoiztetxeak uko egin dio Donostiako Udalaren bederatzi mila euroko laguntzari, atzo jakinarazi zuenez. Laguntza publiko oro baztertu duela zioen, baina gogoratu zuen herritarren-eta babes ekonomikoa lortzeko kanpaina bat baduela.
Hain zuzen, Jorge Fernandez Diaz Espainiako Barne ministroak aste honen hasieran esan zuen Bildu legez kanpo uzteko arrazoia izan zitekeela udalaren laguntza —Bildu dago Donostiako udal gobernuan—.
Josu Martinezek, Eneko Olasagastik, Mireia Gabilondok, Enara Goikoetxeak eta Txaber Larreategik zuzendutako dokumentala da Barrutik begiratzeko leihoak. Bakoitzak preso bati buruzko istorioa kontatu du. Irailean estreinatzeko asmoa daukate.
