Gure Esku Dago egitasmoaren giza katearen berri emateko BERRIA Taldeak ahalegin berezia egin du gaur. Euskarazko egunkariaren historian lehen aldiz arratsaldeko paperezko edizio berezi bat argitaratuko du. Eguerdian egin dute kazetariek egunkari monografiko hori, eta arratsaldean doan banatuko da Gure Esku Dago-k ekitaldiak antolatu dituen tokietan: Durangon, Bergaran, Lazkaon, Etxarri Aranatzen eta Iruñean. Herri horietan ez ezik, Bilbon eta Donostian ere banatuko da. Asteartean, BERRIAren harpidedunek eguneroko egunkariarekin batera jasoko dute edizio berezia. BERRIAren webgunean ere arreta osoa bereganatuko du giza kateak. Plazetan da ale berezia.
[YouTube]http://youtu.be/v3jTDU_AYn4[/YouTube]
Era berean, herri ekinbideko 23 komunikabide —tartean BERRIA— elkarlanean ari dira gaur Gure Esku Dago egitasmoaren giza katearen berri emateko. Era koordinatuan aritu dira Interneten, eta horren erakusgarri da osatzen ari diren argazki bilduma interaktiboa. Argazki guztiak zentralizatzearekin batera, bildumak hedabide bakoitzak partekatuko ditu bere webgunean. 25 bilduma egin dituzte, bakoitzak giza katearen bost kilometro jasoz. Era berean, herritarrei eskatu diete argazkiak Whatsapp bidez —647 31 97 47 zenbakira— zein Twitter bidez bidaltzeko. Parte hartzaileek giza katean dauden kilometroa zehaztu behar dute, eta datozen ordu eta egunetan osatzen jarraituko da.
Elkarlanaren beste fruitu bat izan da Iruñetik 10:00etatik 14:00etara egin duten telebista saioa —23 hedabideetako webguneetan ikusi ahal izan da—. Aurkezleak Info7ko Jon Mikel Fernandez eta Eider Olazar izan dira. Haiekin batera izan dira mahaian BERRIAko Joxerra Senar eta Argia-ko Gorka Bereziartua kazetariak. Konexioak egin dituzte komunikabideetako kazetariekin, testigantzak jasotzeko. Halaber, antolatzaileen streaming-eko irudiak ikusi ahal izan dira, tartean helikopterotik hartutakoak.
[YouTube]http://youtu.be/4t4p_kyvUvk[/YouTube]
Horrez gain, 14:00 aldera lehen laburpen bideoa sareratu du Berria telebistak. Hamaika telebistak laburpen gisako saio bat egingo du igandean, 22:00etatik 23:00etara —BERRIAren webgunean ere ikusi ahalko da—.
Elkarlanean ariko diren hedabideak:
[Youtube]http://youtu.be/DckIa-yDCSo[/Youtube]
BERRIA
Ahotsa.info
Aiaraldea
Anboto
Argia
Arrosa sarea
Beleixe irratia
Barren
Goiena
Goierri irratia eta Goierri TB
Guaixe
Hamaika telebista
Hitza
Hitzondo
Info7
Librean zuzenekoak
Gara-Naiz
Piztu
Tolosaldeko Ataria
Tokikom
Topatu.info
Uriola.info
25 Geltokia
