UEMAri 105. kidea batu zaio gaur: Berrobi (Gipuzkoa) ere Udalerri Euskaldunen Mankomunitateko kide izango da aurrerantzean. Gaur arratsaldeko osoko bilkuran hartu du erabakia udalak.
Beste zenbait arnasgunetan bezala, Berrobin ere datu soziolinguistikoek beheranzko joera erakusten dute azken urteetan. Euskaldunen indizea %87,5ekoa bada ere, euskara lehen hizkuntza duten herritarren ehunekoak hamar puntu egin du behera azken hogei urteotan: %62 da gaur egun. Antzeko joera du etxeko erabilerak ere: hogei urtean hamabost puntu egin du behera, eta euskara herritarren %46rentzat da lehen hizkuntza etxean.
UEMAk abenduaren 16an du batzar nagusia, eta batzarkideek orduan aztertuko dituzte herri berrien eskaerak. Izan ere, Berrobik ez ezik, Mendexak (Bizkaia) eta Hondarribiak (Gipuzkoa) ere galdegin dute azkenaldian mankomunitateko partaide izatea. Bihar, berriz, Lezoko Udalak bozkatuko du UEMAn sartu ala ez.