Jon Darpon Eusko Jaurlaritzako Osasun sailburuak gaur goizean Onda Vasca irratian esan du botiken berrordainketa ez duela gustuko, baina luze gabe ezarriko dutela Osakidetzan. Gaineratu du, beste sistema batzuetan gertatzen ez den bezala, Jaurlaritzak ezarriko duen horretan herritarrak ez duela dirua aurreratu beharko, eta kopuru txikiak ordaindu beharko dituztela herritarrek. Horrela, azaldu du pentsiodunek hilean ez dutela zortzi eurotik gora ordaindu beharko, eta pentsiodun ez direnek botikaren %10 gehiago ordainduko dutela gaineratu du.
Elkarrizketa horretan onartu du Osakidetzako 30.000 langileei lan gehiago eskatzen zaiela lehengo soldataren truke, baina egoera ekonomikoarekin argudiatu du hori, eta esan du "elkartasunagatik bakarrik bada ere" Osakidetzako langileak ezin direla bereizi kalean den egoeratik.
