Bertze hainbat baratze suntsitu egin dituzte makinek Iruñeko Arantzadin

Sartu dira. Makinek Agustin Beroizen Arantzadiko baratzea suntsitu dute, Iruñean. Ez dira lehendabizikoak izan. Abuztuaz geroztik, bertze hainbat lur sail hartu eta hondatu egin dituzte makinek, Iruñeko Udalaren aginduz. Iruñeko meandroan parkea egiteko proiektua dute hiriko agintariek; hori gauzatzeko, hainbat hamarkadaz Arantzadiko paisaiako zati izan diren baratzeak suntsitzeari ekin diote.

Beroizek 50 urte inguru eman ditu Arantzadin bizitzen eta lan egiten. Ostegunean sartzekoak ziren makinak bere baratzera, baina atzo arte ez ziren agertu; goizean goiz ailegatu ziren makinak. Udaltzaingoak lagundu zituen langileak. Inguruak hartu, eta Beroizi babesa eman nahi izan zioten pertsonei bidea galarazi egin zieten. Dozena bat pertsonak baino ez zuten lortu nekazariarengana hurbiltzea. Beroiz azken unera arte gelditu zen bere baratzean.

Udaltzainek lanean ari zen prentsako argazkilari bat atxilotu egin zuten. Ez zioten irudiak egiten utzi, eta atxilotuta eraman zuten Udaltzaingoaren egoitzara. Ondoren aske utzi zuten.

Arratsaldeko zazpietan elkarretaratzea egin zuten Iruñeko Udaletxeko plazan, Beroizen baratzea suntsitu izana salatzeko. Dozenaka lagunek salatu zuten udala Arantzadin burutzen ari den politika. Hain justu, plazan elkarretaratzean zeuden bitartean, osoko bilera egiten ari ziren herriko etxean.