Apaltzeko bidean, baina oso mantso. Egonkortzeko joerari eusten dio COVID-19aren transmisioak Hego Euskal Herrian, baina, lau herrialdeetako datuak aintzat hartuta, bederen, aldaketak ez dira oso nabarmenak. Atzo, 14.044 PCR eta antigeno proba egin zituzten Osasunbideak eta Osakidetzak, eta, horien artean, 778k eman zuten positibo. Atzoko datuen pare, beraz. Positibo tasa %5,5 da orain.
Herrialdeka, beste 61 kasu atzeman dituzte Araban, 366 Bizkaian, 236 Gipuzkoan, eta 108 Nafarroan. Herrialde horretan gehiago nabari da beheranzkoa, eta dezente apaldu da positibo tasa ere: %3,5eraino.
Osasun sarearen egoerari dagokionez, 75 ospitaleratzeren berri eman du Osakidetzak. Orain, 185 gaixo larri daude Araba, Bizkai eta Gipuzkoako ZIU zainketa intentsiboetako unitateetan. Bestalde, azken astebetean birusak jota 40 pertsona hil direla jakinarazi du Osakidetzak.
