Osakidetzak lanpostu gehiago izango ditu; 97 langile kontratatuko dituzte Eibarko (Gipuzkoa) ospitale berrian aritzeko. Gaur goizean onartu du Gobernu Batzordeak. Jon Darpon Osasun sailburuak jakinarazi duenez, guztira 183 langile arituko dira Eibarko ospitalean. Horietako batzuk aurretik ere eskaini diren zerbitzuetan ariko dira, eta gainontzeko profesionalak zerbitzu berrietara bideratuko dira. Lanpostu berri horiekin, 26.497 langile izango ditu Osakidetzak.
Darponek adierazi du ospitalea eraikia dagoela jada, eta datorren astetik aurrera hasiko direla kontratazioak egiten. Egonaldi ertain eta luzeetarako izango da osasun zentro berria. Batez ere, Debabarreneko pazienteentzat izango dira instalazioak, baina baita inguruko eskualdeetako herritarrentzat ere.
