Alonso Abaden eta Salaberria Etxebesteren espetxe aldaketekin —biak dira EPPK Euskal Preso Politikoen Kolektiboko kideak—, irailetik, sei izango lirateke Espainiako Gobernuak hurbildutako euskal presoak. 25 urteko zigorra du Alonso Abadek, eta 1996ko abuztutik dute preso. Salaberriak, berriz, 20 urteko zigorra du, eta 2002ko martxotik dute kartzelan. Biek dituzte beteta, beraz, zigorraren hiru laurdenak.
Irailean bertan, Marta Igarriz hurbildu zuten Logroñora —2. graduan da—, Castellotik (Herrialde Katalanak), eta Kepa Arronategi Zuerara —gaitz larriak dituzten presoetako bat da—, Almeriatik. Urriaren 29an, Jesus Maria Gomez gerturatu zuten Asturiasera, Coruñatik (Galizia), eta azaroan Jagoba Codo Logroñora —gaitz larria du—, Castellotik.
