Beste preso bat hilda topatu dute Zaballako espetxean (Araba), aurtengo hirugarrena. Salhaketak jakinarazi duenez, 32 urteko preso bat urkatuta agertu zen larunbatean, bere ziegan, espetxeko 4. moduluan. Abuztuaren 4an lekualdatu zuten Iruñeko espetxetik Zaballara; Iruñeko kartzelan erizaindegian zegoela jakinarazi du elkarteak. Espetxeko beste preso batzuek topatu zuten hilotz larunbatean, urkatuta, eta suspertzen saiatu ziren medikuak iritsi bitartean, baina hil egin zen. Salhaketak jakinarazi duenez, presoa Zaballako espetxera iritsi zenean espetxeko psikologoarekin egotea eskatu zuen birritan, baina ez zioten eskaera aintzat hartu, eta gizarte langileak baino ez zuen artatu.
Salhaketaren arabera, heriotza hori «ekidin zitekeen tragedia bat» izan da. Halaber, elkarteak salatu du Espainiako Espetxe Erakundeak ez duela heriotzaren berri eman. Espetxeetan beste inor ez hiltzeko, neurri zehatzak eskatu ditu elkarteak. Besteak beste, heriotza horiek ikertzeko eskatu dio Espainiako Fiskaltzari, eta espetxeetako zuzendaritzei galdegin die «inpartzialtasunez» emateko informazioaren berri hildakoen familiei eta beharrezko laguntzak emateko.
