Bi aste barru epaitu ditzakete Espainian espetxeratuta dauden ustezko bi bahitzaileak

Espainian kartzelaratuak dauden Alakrana Bermeoko atunontziaren (Bizkaia) ustezko bi bahitzaileak auzitara eramango dituzte Santiago Pedraz Auzitegi Nazionaleko epailearen aginduz eta epaiketa bi aste barru hasi daiteke.

Auzitegi Nazionaleko magistratuak erabaki hori fiskaltzaren eskariari kasu eginez hartu du. Abdu Willy eta Raageggesey Adji Haman piratei legez kanpoko 36 bahiketa delitu -eskifaikide bakoitzeko bat- eta indarkeria eta armak erabilita lapurreta egiteko delitua egotzi dizkie. Leporatzen zaizkien kargu horiengatik sei urte baino gutxiagoko zigorra jaso dezakete bi bahitzaileek eta Atzerritarren Legea aplikatzen bazaie, Somaliara itzuliko dituzte.

Alakrana itsasontziak 40 egun baino gehiago daramatza Somaliako uretan piraten esku bahituta. 36 kidek osatzen dute tripulazioa, eta zazpi euskal herritarrak dira. Bahitzaileek atunontzia aske uzteko baldintza bezala, Espainian dauden bi piratak libre uzteko eskatzen dute.